Category: 加密常識

買股票可以看基本因素，亦即投資者可以不理會當下的價格走勢，而著眼於企業的營運效率，利潤多寡、壟斷程度、產業前景與及整體經濟表現等等，來判斷那隻股票該入手。 買加密貨幣也可以看基本面，由於此類資產是朝向成為通用貨幣與及去中心化金融（DeFi)兩大方向走，看它們的基本面，就從這兩個角度： 一隻加密貨幣，若處埋交易的效能很高，它的內在價值就高，像 Solana 平均每秒可以處理 400 筆交易，遠高於以太坊的12筆和比特幣的7筆，就明顯佔了優勢；要留意優勢不只因方便流通而被公眾和政府認受，更重要，是有機會跟一些環球金融服務相結合，像Visa 將其穩定幣結算功能擴展到Solana公鏈上，即令solana 的原生代幣SOL 在一季內由20美元飈升上110美元，達5倍有多，其影響比起美國SEC 認受比特幣實貨ETF還要厲害！ 至於DiFi， 其價值在於是否能去中心化，一直以來，我都質疑很多的「質押」如何「生利」，而「生利」後又有無一個「去中心化機制」，將營利分派給當初的質押者，如果當中出現中心化的「干預」，就極可能為被人為所操控，那相關的「內在價值」就很低。 我打個譬如，若有一個去中心化交易所（DEX)，一切運作跟已定的自動化狀態來運行，不為人所支配，負責的人頂多是維護整個系統而已。由此，系統已有protocols 將一對對的代幣交易帶來的佣金，有效地運算並回報到質押者的wallets 處，過程絕不會被人攔截，那這DEX若有原生代幣，就要比那些中心化平台攪質押而生的代幣，來得有價值！ 奈何直至今天，很多DeFi 都極中心化，而且質押的錢也不知怎樣創造營利；更離譜是，還有一個「中心」可信誓旦旦說有幾多回報。既然回報有保證，就已經不是去中心化啦！ 正因如此，這麼多年，我對那些DeFi 項目，極為反感，特別是那些平台搞的，幾近跟龐氏騙局沒兩樣，以高息吸引人入金，美其名叫DeFi 項目，但一點去中心化也沒有！ 我不喜歡以太坊，因為它由此至終，都中心化；而它鏈上的項目，通通都中心化到一個點！ 唯有比特幣鏈上的Ordinals 和Stacks ，稍稍合乎去中心化的原則。

我地必須明白，呢個世界，真係喑藏左一班人，佢地好叻！能夠製造一d極搵笨既潮流，然後導你入局，教你點「玩」，當然，最終你就係要蝕錢收場。 上年的NFT，就係一個例子，一張爛鬼JPEG ，毫無價值，但熱炒中可以炒到上天價，痴鬼線！但市場會將呢個價值合理化，指出NFT 點只係JPEG 咁簡單，實質內蘊無限可能，我心諗：「有乜撚野可能呢！？」好啦，當d儍仔接晒貨，endgame 就係所有NFT 價值跌足九成九，最初創造瘋潮嗰班人就賺到笑，兼同大家講拜拜！ 但錢係要繼續賺既，所以就要新玩法，最近就玩所謂WEB 3.0 社交關係，平台叫Friend.tech。 Friend.tech 勁呀，今次佢將人既價值代幣化。 Friend.tech係點運作呢？好簡單， 喺Friend.tech 上注册既每個用户都需要將佢地帳戶同Twitter 綑綁一起，通過呢種方式，某d好紅既KOL，佢地Twitter 賬戶喺Friend.tech 上會被量化為一個固定數目既社交媒體代幣，其他用户可以用ETH購買呢d代幣既股份，咁買嚟做乜，主要可以同呢d KOL 喺網上聯繫更多，譬如喺網上私人聊天室享有直接對話權；好啦，咁當某位KOL愈嚟愈紅，愈嚟愈多人想喺網上親密d接觸佢，呢d人唯一可以做既，就係同有呢個KOL代幣的人買入，就推高左呢d代幣既價值。 換言之，你早期押注的KOL ，如果佢愈嚟愈受歡迎，你就發啦！因為佢既代幣價值水漲船高！ 要留意既係，無論你買入或賣出，每筆交易都會額外增加 10% 的費用，其中 5% 歸協議所有，另外 5% 歸正在交易的股份持有人所有。 據 Dune Analytics 數據顯示，Friend.Tech自推出測試版後不到 24 小時內就帶來了 7860 名用戶和 4400 個以太坊（810萬美元），達126,000 次交易量，遠遠超過了 OpenSea 在同一時間內的交易量；上線4天，就突破了1.8萬個賬戶，單周交易量牽涉6900ETH……. 雖然我唔知Mirror 有乜好，但佢地絕對可以玩呢個平台嚟cap 水！佢地多鏡粉嘛！ 我個人認為，Friend.tech將會成為嚟緊既代幣瘋潮，而上面嗰d早鳥，最賺錢！ 都係嗰句，唔好以為你加入時，仍係「早鳥」！

我認為：前景無可限量！ 只是，它要經歷一次大災劫，跌到永不超生般，然後，才能鳳凰涅槃，浴火重生！ 怪的就是過去這麽多年，方向走錯，由第一日以太坊以一種「別樣」的中心化崛起後，開創了ICO 後，往後在它錬上發展出來的東西，全是騙財的工具，甚麽標準化Token (ERC 2.0) 、甚麼可生息Token （ERC 777）、甚麽 NFT （ERC 721)….. 通通都成為騙財的工具，被一些極中心化的交易平台所利用！ 結果，走到今天，玩「爛」晒成個去中心化文化！我認為加密貨幣的發展，要推倒重來，要回到六七年前，重新摸索如何再起步。 在各國政府圍攏一起加強監管那些加密貨幣交易平台下，這些中心化交易所的發展會受到很大的制肘，不能再質押了，就沒錢賺，便會慢慢式微。這亦為過去幾年的擒七打八發展，劃上句號！ 伴隨這句號、加密貨幣會進入深冬。不難理解，活動減少了，又看不到未來，strong hold 加密貨幣嚟搏乜；特別是以太幣，又唔比ICO 、又唔比Liquidity Farming (DEX 就行不了）、又唔比DAO(NFT即變垃圾JPEG），我看不到這加密貨幣的價值！V 神還是快點討回那位中國女子歡心，然後趁以太幣有價賣曬出去，快快隱居吧！ 一切一切，會回歸到比特幣的初心：王道是去中心化，我相信到時必定會出現另一番創新景氣，擺脫過去那幾年的荒唐！ 正因為上述的寒冬期，再加上美國不斷量縮，我認為比特幣要見9000美元以下，而以太幣，我有偏見，它會一文不值！ 代之而起，會有些新的加密貨幣崛起，展開新勢態！ 可能到時我都有隻「財Dee 幣」。

也許，近日的文章，我不斷質疑一些加密貨幣交易平台的誠信度和生存能力，大家會認為我過於敏感，又或過份的杞人憂天。 不！真的不是，這是我過去五年的體驗。 2018年6月，我開始認識比特幣，不認識由自可，一認識就沉迷了；那時，我為了促使自己投入加密貨幣的文化中，天天努力學習，各類幣圈活動也涉獵，其中之一，就是差不多所有交易平台，我也註冊了戶口。 然而，一年一年的過去，我不斷收到電郵通知，就是過往這些註冊了戶口的交易平台，陸續倒閉。五年後的今天，還能留下來的交易平台，絕無僅有！大多也消聲匿跡。 加密貨幣交易平台根本先天性就存在缺陷，即使發展到今天，它們仍缺乏一個具可行性和持續性的利潤模式；我可以告訴大家，若這些平台只依賴交易所收的佣金，根本就一定圍唔到皮費；無錯，現在在香港申請牌照的交易平台，我相信它們已有心埋準備要守好多年；這亦解釋了其他平台為何不來申請，香港證監當下只準許這些持牌平台交易比特幣和以太幣，它們發覺根本無利錢可圖，故此缺乏誘因在港持牌經營（當然，它們不申請沒問題，但絕不該說慌說正在申請）。 亦正因如此，這些平台最終必定要發展DeFi，即接受穩定幣的存入，但它們不是傳統銀行，後者已有一套悠來已久的收入模式來支撐利息的支付，但這些交易平台無，最終必定演變成龐氏騙局，不斷以更高的利息吸引新資金，當然，爆煲是遲早發生的事！ 這些交易平台均擺脫不了這種宿命：淪為一個騙局。 我一直也不相信這些交易平台，甚至憎惡它們攪嗅了去中心化生態個「朵」，外行人根本分不清甚麽屬去中心化甚麼屬中心化，只要看到騙案跟加密貨幣有關，就認為加密貨幣是騙人的。 我相信，JPEX 的主腦，現在已開始另闢一個新平台，再打著發展WEB 3.0 的旗號，改頭換面來騙人。 怎也好，只要我們秉持正確的態度，就不會受騙！ 這態度是：我們可相信的只有加密貨幣本身，而非交易加密貨幣的那些擒七打八之平台！

參與加密貨幣既人，好多都鍾意高談闊論自己d見地，懶有insights ，但其實係亂講一通！就好似BitMEX 創辦人兼前 CEO Arthur Hayes ，佢喺新加坡發表演講，話下一波牛市會喺2024 年年初開始，仲話唔只加密貨幣，而係整個風險資產領域都牛氣沖天喎！原因係自 1970 年以嚟，全球債務同GDP 既比例已經從 110% 增加到 360%，而家既債務規模已經同以往大大唔同，佢指出到 2026 年，美國必須開展約 8 兆美元的債券，所以必須尋找願意購買大量債務的投資者，但在人口增長不足下會變得非常困難，因此未來美國政府與中央銀行會透過印鈔來維持 GDP 增長。 你聽得明佢講乜野嘛？我就唔明啦！又話2026年美國要發好多國債，咁又同2024年大牛市有乜關係！？另外，發債同印銀紙咁既關係架咩？如果政府要印銀紙，係買債，而唔係發債，佢根本亂講一通！ 真係唔識Econ 唔好亂講啦！嚇死人！信佢就真係喺幣圈天下無敵！ 好啦！跟住佢又講到AI ，認為 AI 係一種個人既經濟單位，不受人類法律法規既制約，比左AI 同加密貨幣結合的機會，因為佢地同樣係作為一種法律外的資產（AI唔係程式嚟架咩），因此去中心化儲存成為兩者結合的一種解決方案，因為將 AI 的計算數據放喺中心化的公司可能會因為政府介入而需要關閉，而且中心化的公司仲可以隨時調用儲存數據的價格，和擅自取消任何合作，因此去中心化存儲可以提供更多的數據控制和安全性。 真係鳩噏！ 儍既咩！任你點將數據分散儲存，最後你都係要整合一齊比AI 機器學習，咪一樣要中心化，行大數據始終要有server run d 數據，有邊個礦工夠錢買個雪山嚟儲data ；再者，資料可分散儲存，AI 點分散？用伏地魔既分靈體！？係得worldcoin 升到發發聲啦！ 條友更提到去中心化儲存代幣 Filecoin，認為佢從最高 300 美元跌至而家既3 美元，跌幅雖然接近 99%，但真實用戶仲好多，如果未來用戶開始注重去中心化儲存所帶來的各種好處，咁佢認為呢個市場會有好大潛力。 大佬！Filecoin 好多年啦，係得就NFT 熱炒時就飈升，因為當時IPFS 用得最多，但都唔見filecoin炒得起！唉！一件資產跌左99%就唔好拎出嚟叫人投資啦，害死人！ 幣圈真係有好多亂柒講野既人！

Worldcoin 是由 OpenAI 執行長 Sam Altman 創立既加密貨幣項目，聲勢浩大，項目既志向宏大： 「旨在創建一個所有人都擁有的全新身份和金融網路，若Worldcoin 最終能成功，它將顯著增加經濟機會，提供可靠的人工智慧與人類的區分解決方案，同時保護隱私，推動全球民主進程，並最終可能展示一條實現人工智慧資助的全球基本收入（AI-funded UBI）的潛在路徑。」 我不太有熱情，因為我係長期投資者，短期炒作我不懂；當然，我真唔敢抹殺有短線炒作暴利，大家不妨放手一搏。 我無熱情原因有二： 第一，我真睇唔明項目既志向，上面嗰目標好似講到好勁，但我連半句都唔知佢講乜！ 我呢幾年學習科技其中一個心得，就係任你科技幾勁，都只係工具，如何無法應用喺現實生活層面，就一蚊都唔值！Open AI 有用，要多謝大型科企採用，亦即如果無呢d科企（譬如microsoft 同google)基於佢地廣泛的顧客群加以應用呢d新技術，咁呢d甚麽人工智能都係無用，良馬也要有伯樂既慧眼。 所以，單憑係Open AI 既開發者，任佢講到d應用又幾勁，我始終半信半疑，你程式勁，唔係代表你有生活觸覺；大家唔好忘記，Steve Jobs 係屬於後者嗰種人，對生活有超凡既設計感，科技落到佢手就入聖了！ 第二個原因，都係法規問題，你買佢嗰隻代幣，代表你係佢地去中心化自治組織既持份者之一，咁要向美國SEC 申請許可bor! 唔係你集資攪AI 就唔駛依法規呀嘛！而家SEC矛頭正指向呢d非法集資途徑，只要SEC 講一句worldcoin 違法，就炒完。 我繼績工作，都係腳踏實地做野啱我多d。

愈嚟愈多人投資加密貨幣，始終傳統資產市場，好似港股同港樓，愈嚟愈無起色，投進的資金好似深潭般被套牢落嚟，永不超生，要變現就要蝕賣，流動性極低；反觀人地入手比特幣等加密貨幣，唔駛蝕經已開心，仲買到形神俱旺，甚至好有心機研究同儲貨，自己就愈買愈頹；於是，你都忍唔住轉投資加密貨幣。 不過，我覺得好多人投資加密貨幣，心態好似買股票咁，咁就弊傢伙啦，兩者真係有大不同！ 第一，買股票我地真會計較d手續費，譬如而家d港股，升幅有限，如果賺埋都唔夠比手續費，買嚟把鬼咩！但加密貨幣唔同，升起上嚟以倍計，咁嗰d手續費就微不足道，對我嚟講，系統同入金出金夠方使夠穩定最重要，好似投資STX ，無錯用crypto.com 手續費高，但你可以用apple pay 直接買；如果你用其他平台，好似OKX，你要過穩定幣去個平台度，然後先可再買STX，有時見到靚價，好似前幾日STX見過0.4X，曇花一現，你要手快買先得，就無得唔用crypto.com 。 出金就更加無得你揀，你要先去翻交易平台賣出STX ，再轉翻做穩定幣，我就會轉出去Wirex 到供碌咭用，當中有幾輪手續費，但我真唔會計較，盡快出到金就得。 所以，大家投資加密貨幣，要留意高位出貨絕對係一種藝術，要預賺唔足，大有可能只賺到八成。 第二，如果你真係算死草，無問題，咁唔該你所有野要早d做，要早d申請account ，早d部署，因為；大家唔係細路，都應該知道好多野，特別d科技電子野，要腦袋清明靜靜地做先得，唔急得；亦都唔到你急，你開得account 入金，斷無可能一開即得，梗要實名登記，咁人地平台要時間處理同核實架嘛，你絕對無可能即登記即買即用，你自己做野都無咁神速啦！ 我自己就有個習慣，閒時有乜平台有乜wallets，覺得可信，就註冊左account 先，用唔用遲d先算，但要比足時間人地審批，免得account 用時方未有！ 投資加密貨幣，有好多野要準備，因為去中心化，無人會預先叫你做乜做物，要自己主動去學去吸收去掌握。

每次聽到有人用牛熊來形容加密貨幣市場，我就眉頭緊皺，極不以為然，覺得講嗰條友扮曬野，懶專業咁，拋d術語出嚟恫嚇人，毫無依據；講真，乜加密貨幣市場有牛熊可分既咩！ 牛熊市通常係用嚟形容股市，以牛市為例，整個階段通常涉及數年，原因牛市的發展，緊緊扣實整個經濟表現，牛市要成形，一定要走出那個牛熊難分的階段，最重要就係實質經濟要走旺，企業屢創營利新高，於是股價拾級而上，財富效果令全民多了游資，且金融機構又樂於高槓桿放貸，令市場流動性極之充裕，引發全民炒股，就是所謂牛三。 就以現下香港股市為例，是熊三牛一難分階段，全球經濟滯脹，有排未見起色，我地都唔清楚呢個階段要捱幾耐，所以若你問我牛三幾時到？我點知！連牛二股價因企業營利上升呢個階段都未出現，何時牛三，真係言之尚早！ 換言之，我地股市係牛市與否，唔係睇個價升就叫牛市，係要睇埋相應的經濟基調，係有跡可分既！就算我地香港股市嚟緊連續2星期升市，我地都唔可以叫牛二，因經濟環境唔配合；牛三就更加唔駛講，係我地就唔會因嗰3000元消費劵有得拎而咁期待！ 好啦，咁講翻加密貨幣，你用乜野因素推論佢係牛市呢？價升就係牛？咁我用蛇貓鼠龍虎豹任何一款畜生都得 gor bor! 做乜要用牛即！ 「2024年我認爲加密貨幣係豹市！」 都幾好吖，你都係話佢價升咋嘛！ 股票用牛熊形容，背後係有套理論概，多少同企業營利扯上關係，比特幣不是企業，無營利可言，根本唔可以套用呢d術語，你唔可以見家陣比特幣價升，就叫牛一，繼續升，係牛二囉，再升，牛三定啦，咁牛四牛五牛六牛柒都嚟！ 上一次比特幣由9000升到60000左右，只用8個月，你想點切？頭2個月牛一？跟住三個月牛二？然後牛三，佢跟住跌翻落35000左右bor，足足跌左四成，難道是「熊」了一下？然後由牛四牛五牛六，到牛柒65000！？ 你講曬啦！

在我的YouTube 頻道，有舊生問我對JPC 這隻代幣有何看法，坦白講，恕我無知，我連JPC 是一隻代幣也不知，要即Google 下，先知是JPEX的平台幣。 加密貨幣巿場牽涉的層面很廣，而大家有留意我的投資焦點，就知我對加密貨幣的喜愛是充滿「個性」，扮曬有風格。 我第一天喜歡比特幣，是因為它底層技術的精密， 是科技與人性的結合；自此，我逐漸成為比特幣的傳道者，有時在別人面前說起比特幣，雀躍得合不攏嘴，不斷的說呀說，要到某一刻突然意識自己像個推銷員般，才強制自己停下來。 是的，要我青睞一隻加密貨幣或代幣，你必須要有技術底層讓我驚艷，我認為這是加密貨幣投資的「基本分析」。 所以，倘若某隻代幣，只是依附某個自家平台的活動提供優惠，我不是說投資它們一定不能賺大錢，天曉得！只是這種代幣的本質，我不感興趣，或我不懂欣賞，所以我沒看法。 股票市場也不只藍籌股可賺錢，三綫股也可令人賺錢的，只是投資的策略就可真不同了，有莊家操盤，當然要小心點。 但你又真的不能因為人家買某隻代幣賺到「開巷」，你又盲目跟風落注，咁輸錢機會極高。

昨天在我的加幣貨幣telegram 群組中，有舊生問到token 會上區塊錬嗎？這條問題問得不好，的而且確，網上關於這些討論，極其混亂，我亦認為有需要弄清這些「幣類」。 以下的分法，純粹是我對各種幣類內涵的理解而作出的分類方法，純有助大家了解「幣」象，所謂「正統」分法，我不懂。 首先，我想不跟當下的用詞，我不喜歡用coin這個term，太容易令人誤解。我想用我初學加密貨幣時認知的兩名詞：cryptocurrency 和 token，這分法會較清楚。 所謂cryptocurrency，是最原始的加密貨幣，初心是用來作交易媒介，發生在我所謂的最底層的Layer上，我叫Layer 0（其實，你最緊要明白當中的內涵，別被這些名詞嚇唬），是要「挖」要礦工「記錄」在區塊錬上的，亦是最去中心化最可靠，其交易亦不能任意刪改，比特幣和以太幣就是這種。 至於我所謂的Layer 1 ，是提升上述區塊錬底層交易效率的側錬安排，如Bitcoin 的閃電網絡（lightning network）和隔離見證（SegWit）這Layer並沒有任何「幣」出現。 而所謂Layer 2，就是在底層區塊錬所引申出來的副錬所運行的應用項目，最主要以智能合約運作，而各項目亦極需要自己的「幣」來協助運行（因大部份都是借貸合約），於是就出現不用挖的「代幣（Tokens）」，我常提起的STX就是這類，呢d tokens 只要寫幾條程式碼就可生成，極易！咁係咪扼人？要睇相關項目的應用廣泛性，我們不可以否認，有些項目是很用心做的，其代幣就有一定的潛力（當然，用心亦要迎合市場所需），這些代幣會上區塊鍊嗎？應該這樣說，這些代幣的往來是伴隨著智能合約的運行，而智能合約是在區塊錬上應用的，紀錄當然有，亦不可竄改；所以你要擔心的不是有無記錄，而是它們有無價值，只因好多呢d代幣只想純增加某特定借貸情境的流動性，與及轉移法律責任才發行，去中心化並不是它們相關組織的考量因素。 以上這些「幣」演變到今日，有些又要挖又可應用在智能合約，於是又出現另一些名詞，甚麼「原生幣」、「原生代幣」和那個英文字「coin」，個人認為，SOL 和BNB 屬於這一類。 一言以蔽之，一隻「幣」有無價值，觀其應用之廣泛性！